英足盃决赛破天荒上演「曼市打吡」！周日(23日)英足总4强赛事，曼联同白礼顿喺温布莱球场激战120分钟互无纪录，最後互射12码踢到突然死亡阶段，曼联先至以7比6赢出，有望继拎到英联盃冠军後，实现本土盃赛「双冠王」美梦。曼联决赛将会硬撼曼城，亦系史上首次出现呢两支同市劲旅合演嘅盃赛决赛。
阵容不整嘅曼联今场发挥理想，虽然白礼顿占据主动，但佢哋嘅反击亦甚具效率，攻门次数系15次(白礼顿)对14次(曼联)，若非两队西班牙门将罗拔山齐士同迪基亚都有出色表现，绝对唔会互交白卷。互射12码阶段，双方头6轮全部射入，但白礼顿第7轮嘅苏利马治一射冲天，曼联就由域陀连迪路夫射入致胜一球，成功杀入决赛。
今次系曼联历来第21次杀入英足盃决赛，追平阿仙奴保持嘅最多次入决赛纪录，「红魔鬼」将会喺6月3日同曼城争夺冠军，亦系呢两支曼市死对头，史上首次喺盃赛决赛争霸，令呢场王者战更有睇头。曼联想做英联盃同英足盃「双冠王」，曼城亦力争做英超、英足盃同欧联「3冠王」，恶战难免。
