热刺争入英超前4受到重大打击，佢哋周六(15日)主场被般尼茅夫绝杀惨输2比3，一众防线「炸弹人」被球迷丧闹，後备上阵嘅达云臣山齐士耻辱性踢23分钟就被换番走，离场嗰阵失望坐喺後备席喊；另一罪人柏度朴路赛後亦关闭社交网，逃避球迷嘅辱骂。
热刺今场14分钟由孙兴民先开纪录，但35分钟有中坚基文迪朗格勒伤出，要由达云臣山齐士入替，3分钟後即被般尼茅夫追成平手；51分钟达云臣山齐士犯错被苏兰基射入，之後佢每次掂波都被主队球迷狂嘘，结果58分钟就被调离场。热刺去到完场前2分钟由哥尔尼维特远射追平2比2，以为可以执番1分，点知补时5分钟被奥亚达拉偷袭得手，输2比3完场。
热刺队长洛里斯赛後批评球迷嘅欺凌行为：「我嘅足球生涯从未见过呢种场面，我戥达云臣山齐士难过，佢系我队友兼朋友，佢多年来都努力为球队而战，对球会、球迷同球员嚟讲，呢个都系一个伤心嘅故事，系足球场上冇人想见到嘅事。」同样喺今场犯错失波嘅柏度朴路，赛後将自己IG同Facebook帐号关闭，避免热刺球迷「洗版」。
