基利安麦巴比日前宣布继续留效巴黎圣日耳门(PSG)，最大目标系协助球队赢得欧联冠军，仲话参加奥运系佢梦想，2024巴黎奥运可能见到佢。
去年突然转軚拒绝皇马、续约PSG後，麦巴比被球迷戏称为「麦总」，不过佢同会方合约只系签2+1，明年约满後可自行决定去留，令佢动向再添变数，直至《France 3》日前一个访问，麦巴比亲自宣布留队决定。
麦巴比表示：「我下一步系赢欧联冠军，我哋已经试过打入决赛、4强、8强、16强，除咗捧盃之外都经历过，我希望尽快实现捧盃。喺边度？在巴黎圣日耳门，我系巴黎人，仲有合约，所以喺巴黎。」
「麦总」留喺巴黎仲有另一目标，就系参加奥运：「参加奥运会系我嘅梦想，尤其奥运会喺巴黎举行，不过呢件事并唔系我一个人决定，仲要同球会、国家队讨论，奥运会之前有欧国盃，都要考虑，我亦唔会强逼自己参加奥运。」
