李斯特城早前炒咗领队罗渣士之後，终於搵到新帅，宣布聘请甸恩史密夫担任看守领队，直至今季结束。呢位前阿士东维拉主帅搵来车路士名宿泰利做副手，即时令教练团星味大增。
现年52岁嘅甸恩史密夫曾经执教华素尔、宾福特、阿士东维拉，上年12月因为领军成绩差，被英冠球队诺域治炒鱿，估唔到依家反而有得教英超球队。甸恩史密夫话：「好开心可以带领李斯特城出战今季余下赛事，目前有唔少挑战，但我哋嘅教练团队已经有晒经验，知道点样处理。」
甸恩史密夫今次入「城」，最受注目系2位助教泰利同格力沙士比亚，42岁嘅泰利球员生涯成就辉煌，佢曾於2018至2021年担任当时阿士东维拉主帅甸恩史密夫嘅副手，两人合作愉快，今次再拍住上。
至於59岁嘅格力沙士比亚曾於李斯特城工作多年，球队夺得2016年英超冠军，佢系领队云尼亚里嘅副手，其後云尼亚里被炒，格力沙士比亚亦短暂做过李斯特城看守领队，非常熟悉球队情况，佢亦曾於维拉同甸恩史密夫合作过，大家同赶同气，希望呢个「铁三角」可以拯救到陷入降班威胁嘅李斯特城啦。
