曼联周六(8日)英超主场2比0击败爱华顿，不过首席射手拉舒福特喺比赛尾段伤出，怀疑鼠蹊部出现问题，领队坦哈格赛後承认伤势「唔太乐观」，并批评赛会安排佢哋6日内连踢3场波，系导致拉舒福特受伤嘅主要原因。
坦哈格赛後讲到拉舒福特伤势非常忧心：「我唔知实际情况，当球员短时间内踢咁多场波，恢复唔切就会增加受伤风险。依家唔知拉舒福特伤成点，就连佢自己都唔会知，只可以等待诊断结果，但系睇落情况唔太乐观。」
坦哈格之後将矛头指向赛程：「伤患系难以控制，但赛程系可以控制，我哋上星期日踢尾场，今个星期六踢头场，我哋之前打入英联盃决赛，就要面对咁密集嘅赛程，即系我哋因为成功而受到惩罚，呢个系唔应该发生嘅事。」曼联今季余下赛事仲要应付英超、英足盃及欧霸盃，球员真系踢到脚软。
