近期状态巅峰嘅曼城，周日(9日)凌晨英超继续大开杀戒，挪威前锋艾宁夏兰特复出即入2粒，包括一记超精彩嘅倒挂金勾入波，带领「蓝月亮」作客4比1大炒修咸顿，喺各项赛事录得8连胜佳绩，其中6场仲系赢3球或以上，最後冲刺嘅霸气唔讲得笑！
曼城周中要喺欧联大战拜仁慕尼黑，不过今仗照样全力出击，完半场前奇云迪布尼传中，艾宁夏兰特泰山压顶头槌先开纪录。换边後曼城愈战愈勇，基亚利殊58分钟连环射门得手，10分钟後佢左路传中，冲前咗嘅艾宁夏兰特即转身施展倒挂抽入。修咸顿之後由马拉破蛋，但祖利安艾华利斯75分钟射入12码，助曼城大胜4比1。
连埋今场2个入波，艾宁夏兰特今季英超已入30球，成为英超史上用最短时间(27场)入30球嘅球员，领队哥迪奥拿赛後大赞佢有「球王级」表现：「球坛过去20年有2个神奇嘅前锋──美斯同C朗拿度，艾宁夏兰特就系呢个水平，佢入咗好多好多波，以佢嘅年纪嚟讲赛在难以置信。」
曼城各项赛事已经连赢8场，依家喺英超落後榜首阿仙奴5分，周三(12日)凌晨亦要喺欧联8强首回合迎战拜仁慕尼黑，英足盃又已经杀入4强，有望向「3冠王」目标进发。
