周日(9日)凌晨法甲，巴黎圣日耳门(PSG)作客以2比0击败尼斯，结束2连败颓势，球王美斯今仗发威，射入1球及1次助攻，呢位35岁阿根廷国脚喺欧洲球会赛事累积入702球，超越宿敌C朗，成为欧洲球会赛史上第一射手王。
开赛26分钟美斯射入打开纪录，换边之後，美斯开出角球，由中坚沙治奥拉莫斯顶入成为2比0，呢2位昔日巴塞同皇马嘅死对头，今仗合作创造入波，显得特别有趣，PSG赢波後，继续领先第2位朗斯6分。
美斯今季各项赛事为PSG上阵34场入19球，欧洲球会赛事累积入702球，以1球优势超越宿敌C朗，而且美斯仅踢841场就入702球，反观C朗踢咗949场先至入到701球，可见美斯入球率极高，并以呢个神纪录反击近期不断嘘佢嘅PSG球迷。
此外，美斯喺欧洲5大联赛累积入494球，仅少过C朗1球，由於呢位葡萄牙球星已经去咗沙特阿拉伯搵食，美斯要超越对方指日可待。
