周日(19日)英超赛事，榜首阿仙奴主场4比1大胜水晶宫，喺联赛抛离踢少1场嘅曼城8分，形势大好。阿仙奴近期火力全开，布卡约沙卡今场交出2入波同1助攻後，成为今季英超首个入球+助攻都达双位数字嘅球员。
阿仙奴喺欧霸盃16强出局，返到英超即全力开火，28分钟加比尔马天尼利接应布卡约沙卡传中射入，43分钟布卡约沙卡突破越位射成2比0。阿仙奴下半场继续围攻，格列沙加55分钟再入1球，就算水晶宫之後藉角球破蛋，但布卡约沙卡74分钟埋斋，带领阿仙奴大胜4比1。
布卡约沙卡今季英超累积12个入波同10次助攻，系今季英超首个「双双」球员，亦系自16/17球季嘅阿历斯山齐士後，阿仙奴首个交出「双双」数据球员。布卡约沙卡赛後表示：「帮到球队我就开心，无论系入波或者助攻，今场我做得到并且赢波，所以我好开心。」
