近期状态回勇嘅车路士，周日(19日)凌晨英超主场两度领先上，被爱华顿临完场前入波逼和2比2。车路士再之失分，德国前锋夏维斯就成话题人物，佢今场入波後寸爆向爱华顿门将比克福特「扮鬼脸」庆祝，最终赢唔到波而被网民耻笑，连领队朴达都闹佢唔应该咁做。
车路士今场控制大局，52分钟由祖奥菲历斯射成1比0，不过佢哋防守麻麻，69分钟防守角球走甩杜哥利被追平。车路士76分钟由列斯占士博到12码，夏维斯操刀射入再度领先，呢位德国国脚入波後忽然招积，对住爱华顿门将比克福特伸脷扮鬼脸，怀疑系报复对方射12码前嘅骚扰战术。但系爱华顿喺完场前1分钟由22岁小将森斯追和2比2，令车路士未能笑到最後。
车路士失分後继续排喺联赛榜第10位，夏维斯嘅鬼脸庆祝就成为笑柄，连领队朴达都睇唔过眼话：「当球员入波之後，佢哋会有啲情绪想释放，我自己唔系入过好多波，所以唔系好清楚，球员应该享受庆祝入波，但唔应该将对手拉埋入嚟。」
