英格兰周四(16日)公布本月底欧国外对意大利及乌克兰大军名单，两名争议性人物，被控赌波嘅艾云东尼，同埋早前露械嘅基尔获加双双入选，主帅修夫基似乎唔担心外界目光，亦唔怕影响士气。
同卡塔尔世盃比较，後衞高亚迪、宾韦特同阿历山大阿诺特落选，补入芝维尔、马克古希同列斯占士，中场人脚不变，前锋就多咗艾云东尼，取代史达宁，哥林威尔逊因伤落选。
今次最大争议相信系艾云东尼，呢位宾福特前锋今季各项赛事攻入17球，入选好合理，但就因为赌波官司缠身，已经错过卡塔尔世盃，佢被控多达232条控罪，面临停赛处分，但修夫基一样选佢。
至於基尔获加，就喺个多星期前爆出参加变态派对，仲有露械片段曝光，令到曼城都好尴尬，不过修夫基并未受事件影响，照选佢入去，似乎唔惊佢影响其他队友。
英格兰大军名单
门将
比克福特（爱华顿）、尼克普比（纽卡素）、兰斯达尔（阿仙奴）
後衞
芝维尔（车路士）、艾历迪亚（热刺）、马克古希（水晶宫）、列斯占士（车路士）、劳基梳尔（曼联）、哈利马古尼（曼联）、基尔获加（曼城）、史东斯（曼城）、捷比亚（纽卡素）
中场
祖迪比宁咸（多蒙特）、干拿加历查（车路士）、佐敦轩达臣（利物浦）、占士麦迪臣（李斯特城）、美臣蒙特（车路士）、加云菲腊斯（曼城）、迪格兰赖斯（韦斯咸）
前锋
菲尔科顿（曼城）、基亚利殊（曼城）、哈利卡尼（热刺）、拉舒福特（曼联） 、布卡约沙卡（阿仙奴）、艾云东尼（宾福特）
