今季疯狂增兵嘅车路士终於踏入收成期，喺周六(11日)晚英超作客以3比1击李斯特城，各项赛事取得3连胜。1月以8,800万镑天价转会费加盟车路士嘅翼锋梅迪历，第7次上阵终於有份直接创造入球，贡献1次助攻，避过做「007」尴尬局面。
开赛11分钟，车路士迅速打开纪录，芝维尔抽射入网，呢位左闸自上年9月初之後，终於再尝入波滋味。李斯特城亦不不甘弱，39分钟达卡喺禁区边劲射入网扳平1比1。战至上半场补时，夏维斯近门凌空挑射入网，车路士再次领先。
下半场中段，梅迪历突然发威，先系射门入网，可惜被吹越位，3分钟後佢头槌二传，由高华锡射成3比1。
曾经备受吹捧嘅梅迪历由萨克达加盟车路士後，表现令人失望，首6次上阵冇入波，亦冇助攻，被网民冷嘲热讽，睇死佢今场会成为「007」，幸好呢位22岁乌克兰国脚来到第7场上阵，虽然入波食诈胡，但总算贡献助攻，唔使做「007」。
车路士踏入3月後大翻身，近3战全胜，包括欧联淘汰多蒙特，打入8强，加上英超连取6分，特别系今场赢波，打破各项正式赛事连续10场作客不胜困局，已渐入佳境，备受下台压力嘅领队朴达可以暂时松一口气。
