今季英超成绩沉沦嘅车路士，喺欧联赛场过关斩将，周三(8日)凌晨16强次回合主场2比0击败多蒙特，两回合合计反胜2比1晋级8强。今场本来系车路士领队朴达嘅生死战，传闻如果车仔出局佢会被炒鱿，结果朴达唔单止死过翻生，仲成为欧联20年来最成功嘅英籍领队！
首回合落後0比1嘅车路士，面对大勇嘅多蒙特未见优势，但客队5分钟就有核心人物祖利安白兰特伤出，踢到43分钟车仔幸运先开纪录，史达宁射门挞Q，但个波撞返落自己脚下，史达宁再次抽射先开纪录，总比数亦追成1比1平手。
53分钟车路士获得12码，夏维斯操刀中柱弹出，但VAR发现有多蒙特球员提早走入禁区，令夏维斯意外得到「补镬」机会，呢位德国国脚第2次操刀成功射入。多蒙特最後发起狂攻，但未能撕破车路士嘅防守，最终车路士赢2比0，总比数反胜2比1晋级。
赛前有传今仗系朴达嘅「帅位之战」，如果出局就被会炒鱿，结果系朴达命不该绝，佢更成为自卜比笠臣喺02/03球季(执教纽卡素)後，史上第2个系单季欧联拎到5场或以上胜仗嘅英格兰领队。车路士历来3次杀入欧联决赛，领队格兰、迪马堤奥同杜曹都系开季之後临时接手，上年9月接替杜曹嘅朴达有望延绩呢个「优良传统」。
朴达赛後表示：「呢场比赛好激动，所有球员都踢得好出色，更衣室内气氛非常好，我哋一齐经历好艰难嘅时刻，欧联对车路士嚟讲意义重大，呢场胜仗为未来几个星期打好基础。」
