车路士喺欧联16强次回合反胜多蒙特晋级，致胜一球来自夏维斯嘅12码，不过呢个关键入球就充满争议，事关夏维斯首次操刀系宴客，但VAR认为多蒙特球员提早走入禁区，结果判夏维斯重射，令佢喺Take 2射入呢个帮车路士出线嘅入球。
呢个12码嘅出现本身已有争议，芝维尔嘅传中近距离省中马里奥斯禾夫只手，球证本来冇示意，但VAR介入後改判12码。夏维斯「窒步式」主射中柱弹出，不过当时数名多蒙特同车路士球员都冲入禁区，由於解围嘅沙利奥斯简亦系其中一个「偷步」球员，所以VAR判夏维斯重射，并扭转结局。
多蒙特中场祖迪比宁咸对呢个判决非常不满：「呢个手球判决本身已经令人失望，而重射嘅决定更加系一个笑话！好似夏维斯咁样『窒步』，有咩球员会唔走咗入禁区？我唔想再讲惹麻烦，我已经畀人罚咗好多钱。」
