意大利今个月底将在欧国外主场迎战英格兰，主帅文仙尼现时遇上一大难题，就系国家队冇啱用前锋，因此打算召回已远走美职嘅恩斯治尼，仲有佢FC多伦多拍挡贝拿迪斯治，迎战英军。
文仙尼表示，今场系佢好拍挡维埃里病逝後首场国家队主场比赛，意大利会更加强大，但前锋线遇上难题，佢话：「问题都几棘手，恩莫比尼、拉斯柏度尼同施卡马卡受伤，其他人选例如比洛迪喺所属球会都系後备，只有列斯联嘅基诺图有较多比赛机会。」
至於「小王子」尼高路辛尼奥路出走土超加拉塔沙雷，原来亦系文仙尼嘅建议，最重要系有得落场比赛。
最後佢话：「依家喺紧急情况下，召回恩斯治尼同贝拿迪斯治，点解唔可以？恩斯治尼仍可发挥作用，大家不妨睇吓。」31岁嘅恩斯治尼2012年开始入选意军，上阵54场入10球。
