利物浦今季成绩大跌，不过近期有复苏迹象，射手穆罕默德沙拿喺「双红会」交出2入波同2助攻後，以累积129个英超「士哥」，超越传奇科拿成为利物浦史上英超最多入波球员。穆罕默德沙拿今仗如入无人之境，其中一幕扭到利辛度马天尼斯一仆一碌，画面相当尴尬。
沙拿今场直接间接制造4个入球，最精彩一幕系50分钟助攻加普赢3比0嘅入球，佢喺右路单挑利辛度马天尼斯，先用假身呃到对方唔知转去边，当利辛度马天尼斯回身想追仲跌埋落地，睇住沙拿交畀加普射入，网民纷纷留言：「沙拿咁样对利辛度系犯罪」、「马天尼斯仲喺度自转紧」、「冇谂过马天尼斯会畀人摧毁成咁」。
沙拿近2场联赛入3球，效力利物浦6季累积129个联赛入波，超越科拿(128球)成为利物浦史上英超入波最多球员，呢位埃及前锋赛後表示：「呢个纪录非常特别，当我第1季加盟利物浦入31球，我已经想成为利物浦嘅英超入球王，能够喺利物浦赢冠军同破纪录系一大光荣。」
