阿仙奴周日(5日)凌晨英超3比2绝杀般尼茅夫，如果唔系赖恩尼尔逊救命波，相信VAR会再成为焦点。阿仙奴今场录得32次攻门，系今季英超最高纪录，般尼茅夫除血肉长城之外，今仗竟然有4次禁区内手球事件，当中VAR有3次介入，但全部冇判12码引起极大争议。
33分钟麦菲咸同法比奥韦拉争顶，预唔中个波後，伸出嘅左臂明显打中个波，但VAR检查完认为冇问题；73分钟积克史堤芬斯疑似用手封阻布卡约沙卡传中，但球证同VAR都冇任何反应；最争议性一幕喺80分钟，菲腊标宁同马高斯辛尼斯短时间内2次手球，分别挡走马田奥迪加特射门同加比尔马加希斯头槌攻门，而且都颇为明显，但VAR两次判决都系「最後冇事」。
两位为电视台评述嘅名宿舒利亚同基云，都质令VAR嘅判决，舒利亚表示：「阿仙奴绝对可以有12码，如果系上季一早已经畀咗(12码)。」基云就和应话：「今季畀12码嘅门槛系高咗，般尼茅夫系极之够运，但我认为今场手球系应该畀12码。」阿仙奴上月对宾福特，因VAR球证唔记得画越位线而被逼和，负责球证李美斯事後亦被炒鱿。
