利物浦嘅「埃及文明」锋线曾经叱吒一时，随住沙迪奥文尼离队，罗拔图法明奴踢埋今季亦约满走人，呢条传奇锋线亦会告一段落。不过今场「双红会」似乎见证另一支三叉戟诞生，加普、达云纽尼斯同穆罕默德沙拿嘅组合擦出火花，前两者本来系曼联今季嘅收购目标，依家变成利物浦嘅新台柱。
曼联上年夏天本来想签达云纽尼斯，结果被利物浦截胡；今个冬天坦哈格想引入加普，但又被利物浦截足先登。当达云纽尼斯季初失机频频、加普转会头6场都冇波入，唔少曼联球迷齐声话「好彩签唔到」，结果今场正面交锋就中晒回力镖。
加普近期以「假9」身份上阵，配合达云纽尼斯同穆罕默德沙拿一左一右进攻，今仗3人各自梅开二度。Opta数据显示，今次系英超史上第4次有「三叉戟」同场梅开二度，对上一次出现系1999年曼联嘅高尔、约基同苏斯克查。
利物浦领队高普赛後大赞呢条全新锋线：「所有人都睇到佢哋有几劲，冇人怀疑过纽尼斯嘅影响力，佢融入之後系一股强大力量；加普踢嘅系最难嘅位置，但佢做到晒所有工作；沙拿就系沙拿，今场大家睇到佢嘅表现。」
