当车路士、阿仙奴、曼联等喺冬季转会窗积极增兵，富豪球会曼城反而非常淡静，唯一一个收购就系800万镑由沙士菲罗致新星佩朗尼。普遍预计20岁嘅佩朗尼会喺青年军磨练，不过佢嘅表现似乎超出预期，近期多次打入大军名单，上仗对般尼茅夫更处子上阵！
司职中场嘅佩朗尼，对般尼茅夫一仗72分钟入替艾宁夏兰特，同加云菲腊斯合组中场表现唔错。佩朗尼1月加盟後，先随阿根廷U20踢南美国家盃，归队後今个月已经3度入选比赛日名单，下场英足盃对布里斯托城，好大机会再有上阵机会。曼城另一新星列高路易斯表示：「佢系个顶级球员，佢同队练波非常合拍，感觉好似系一个效力曼城好多年嘅球员。」
据报佩朗尼同上年夏天加盟嘅同乡祖利安艾华利斯，感情非常之好，佩朗尼更表示自细已经锺意睇曼城：「我经常睇曼城比赛，因为佢哋有好多阿根廷球员，我拣着32号有好多原因，其中一个就系因为泰维斯喺曼城着呢个号码。」
