纽卡素喺英联盃决赛饮恨而回，赛前焦点人物卡利奥斯，相隔728日後首次喺正式赛事上阵，而且一踢就系决赛，唔少球迷都担心呢位有「虾碌」前科嘅门将会出事。不过呢位德国门将今场表现出色，全场作出8次成功扑救，2个失球都责任唔大，演出赢得球迷掌声。
由於正选门将尼克普比停赛，2号门将杜巴夫卡又唔合上阵资格，令卡利奥斯要临危受命把关，佢亦高接低挡救出8次攻门，纽卡素领队艾迪侯域赛後表示：「佢踢得好好同好全面，连分波都做得出色，当我哋落後焗住要进攻嗰阵，卡利奥斯作出精彩扑救，佢可以为自己今日嘅演出自豪。」
球迷对卡利奥斯喺决赛演出都系赞扬，不过佢今仗所戴嘅手套就畀唔少人弹，对啡色手套非常「复古」，大批网民留言：「呢对手套系咪二战时期嘅物品？」「点解同我爷爷对手套一样？「我知卡利奥斯好耐冇踢，系咪要去工作坊临时整对出嚟？」
