曼联中坚哈利马古尼今季失去正选位置，唔少球迷眼中佢只系「挂名队长」，般奴费南迪斯先系球队真正队长，不过曼联捧英联盃冠军嘅时刻，球会就安排般奴费南迪斯同哈利马古尼一齐负责高举冠军，而「马队长」更献出精彩一幕，被曼迷大赞系全季最佳表现。
哈利马古尼喺2019年加盟曼联，球队一直未能捧盃，虽然今季长坐冷板，但今场决赛最後2分钟，仍获坦哈格派遣上阵，最後更加成为2017年嘅朗尼後，首个帮曼联捧盃嘅队长。哈利马古尼赛前已经话：「做曼联队长系无上光荣，以队长身份捧盃更加系梦想。」
哈利马古尼喺上颁奖台领奖期间，被影到漠视班主之一阿夫拉姆格拉沙嘅热情鼓掌，零眼神接触咁直行直过走去捧盃，完全唔畀面呢位球迷讨厌嘅老板。事後大批网民大赞马古尼：「呢一幕系佢今季代表作」、「马古尼成为曼联球员後，最有队长风范嘅一件事」、「我会重新尊敬马古尼」、「你以後唔会再听到我讲马古尼坏话」......
