阿仙奴中场艾利尼上月严重受伤，做手术後今季提早收咧，球会亦已签入佐真奴代替，普遍估计艾利尼季尾约满後将黯然离队，不过阿仙奴周三(22日)宣布同呢位埃及国脚续约1年，令佢可以喺生活得到保障下安心疗伤，真系有情有义！
30岁嘅艾利尼已效力阿仙奴7年，虽然唔系正选球员，但亦深受球队上下欢迎，佢上月做膝部手术後将休息一段长时间，今次获阿仙奴开出新约，艾利尼表示：「我喺阿仙奴嘅新一页开始，阿仙奴唔单止系我效力7年嘅球会，亦系我嘅屋企、家庭、快乐、成长同目标，我好爱我嘅阿仙奴大家庭。」
阿仙奴领队阿迪达早前已经暗示会同重伤嘅艾利尼续约：「当事情出现困难，球会要做正确嘅事，我哋有啲优良传统值得跟随。」阿迪达所指嘅优良传统，就系对重伤球员嘅照顾，之前辛迪卡索拉、阿迪达效力阿仙奴晚期，都系长年养伤，但阿仙奴仍然同佢哋续约兼安排读教练课程，令球员可以安心医治。
