巴塞隆拿今季成绩突出，球队年轻化成效显着，不过34岁中场布斯基斯仍然占有重要席位，据报呢位多年老臣拒绝大幅减薪续约，季尾好可能会以自由身离队。消息指巴塞隆拿已做好准备，有意重槌斟介曼城中场洛迪卡斯简迪做接班人。
据网站《Football Insider》，巴塞教练沙维非常欣赏洛迪卡斯简迪，认为佢系代替布斯基斯嘅最佳人选，消息指球会已经展开斟介嘅前期工作，预计会拨出9,000万欧元作转会费资金。洛迪卡斯简迪喺曼城系绝对主力，但效力巴塞隆拿系多数西班牙球员梦想，呢位前马德里体育会中场有机会被打动。
26岁嘅洛迪卡斯简迪喺2019年加盟曼城，4季合共上阵185场，有15个入波同14次助攻，曼城今季收购英格兰国脚加云菲腊斯，本来想佢同洛迪卡斯简迪竞争，但加云菲腊斯表现令人失望，曼城今季24场联赛，有23场都由洛迪卡斯简迪正选上阵。
