加蓬前锋奥巴美扬上年获恩师杜曹邀请，回流英超加盟车路士，点知佢「上车」冇耐杜曹就被炒鱿，而奥巴美扬喺新帅朴达带领下未受重用，自1月对利物浦後备上阵踢9分钟後，就从未喺车路士出现过，近日佢终於再披车路士战衣，可惜只系喺米兰同朋友踢5人赛，真正复出遥遥无期。
车路士1月签入梅迪历、祖奥菲历斯等攻击球员後，奥巴美扬已被掟入雪柜，唔单止冇份注册踢欧联，近3场联赛就连大名单都冇份入选。呢位33岁老将近日获准出国旅游，佢喺米兰同朋友踢室内5人赛，而且仲着住车路士件9号波衫，球迷见到都觉得唏嘘。
据英国《每日镜报》报道，奥巴美扬同车路士仍有1年半合约，但佢获解冻嘅机会好微，预料今夏双方会商讨解约，奥巴美扬有机会去沙特阿拉伯或美职搵食。
