利物浦近期表现回勇，喺联赛连赢爱华顿同纽卡素，当中关键人物系18岁新星巴斯迪！呢位中坚转踢中场嘅西班牙球员，自1月中上位後场场都正选上阵，而且表现愈踢愈好，不过有球迷就担心巴斯迪好快会被「搾乾」，不过领队高普就表明巴斯迪唔需要休息。
巴斯迪自1月英足盃对狼队担正後，已经连续7场比赛正选上阵，对一位18岁新人嚟讲系几大负担，对此高普表示：「我哋有统计每个球员嘅负荷，当然每个球员都唔同，我哋经常都会审视，暂时冇迹象显示佢需要休息。」
巴斯迪可以选择代表西班牙或塞尔维亚，佢爸爸就曾经做过塞尔维亚国脚，而且同堤亚高艾简达拿嘅爸爸喺切尔达做过队友，估唔到两位「星二代」喺利物浦又做队友，高普对巴斯迪就充满期待：「佢系超级天才，我谂塞尔维亚同西班牙混合，喺足球嚟讲系个唔错嘅DNA！」
