英超冠军争逐戏剧性十足，上场赢阿仙奴重登榜首嘅曼城，周日(19日)凌晨作客被诺定咸森林逼和1比1，「1哥」位置又让番畀较早前4比2反胜阿士东维拉嘅阿仙奴，曼城依家落後「兵工厂」2分兼踢多1场，争标形势又变得被动。
曼城今场一如所料控制战局，但面对森林严密防守机会唔多，41分钟靠贝拿度施华禁区外轰入世界波打破僵局。67分钟曼城有黄金机会，艾宁夏兰特门前10码「执鸡」抽中门楣，个波弹番落佢面前，呢位挪威前锋小禁区面对再射竟然抽高。曼城前面入唔到，84分钟走甩基斯活特被对方门前射入，最後打和1比1痛失2分。
曼城领队哥迪奥拿赛後表示：「恭喜森林拎到1分，佢哋踢得好出色，我哋都踢得好好，但入唔到波令人好失望，我哋有几球喺龙门前面1米都入唔到，咁我仲可以讲乜嘢？」
