纽卡素喺英联盃决赛爆门将危机，首席门将尼克普比喺对利物浦一仗被逐将会停赛，副选杜巴夫卡又唔合上阵资格，惯常3号门将卡尔达路上月被外借，据报纽卡素正考虑各种解决方案，最大机会就系起用前利物浦门将卡利奥斯，「红军」领队高普就表示：「卡利奥斯值得纽卡素信赖！」
29岁嘅卡利奥斯曾效力利物浦2季，最经典当然系2018年欧联决赛，两度送礼令利物浦1比3输畀皇马，呢场亦系佢最後一次为利物浦喺正式比赛上阵。卡利奥斯今季以自由身签约纽卡素，但只系4号门将，从未喺任何赛事上阵，估唔到首演可能就系英联盃决赛大战。
据报纽卡素正考虑各种方案，包括为尼克普比红牌提出上诉，向侯城提早回收卡尔达路已被证实「行唔通」，领队艾迪侯域甚至考虑用5号门将马克基利士比，至少佢今季曾喺英超B联赛上阵，比赛状态可能好过卡利奥斯，艾迪侯域表示：「我对2个门将都有信心，佢哋全季都同球队一齐竞争。」
至於利物浦领队高普亦向纽卡素球迷派定心丸：「纽卡素可以完全信赖卡利奥斯，呢一点无庸置疑，佢系一个伟大门将，否则纽卡素都唔会签佢，当然我亦戥尼克普比可惜，佢非常之唔够运。」
