巴黎圣日耳门(PSG)喺欧联16强首回合输畀拜仁，不过对超新星沙利艾美利嚟讲就好有意义，佢以16岁343日之龄正选上阵，成为欧联史上最年轻喺淘汰赛担正球员，连队友都形容佢劲到似「异形」
沙利艾美利近期人气爆发，抢赢卡路士苏拿、法比安雷斯等球星成为正选，生涯首次喺欧联正选上阵就系对拜仁嘅大战，足证教练加迪亚对佢信心爆棚。沙利艾美利喺06年3月出世嗰阵，队友沙治奥拉莫斯已经喺欧联16强上阵，今场竟然同场出战欧联16强，相当有趣。
虽然只系得16岁，但沙利艾美利嘅天赋就连队友都惊叹，中场域天拿同佢都系用佐治文迪斯做经理人，据报该葡萄牙国脚加盟後，睇沙利艾美利练波後非常震惊，曾问佐治文迪斯：「你签呢个系咩人？佢简直系异形！」
