曼城周一(13日)凌晨英超3比1击败阿士东维拉，赢波过程非常轻松，不过期间就出现「争射12码」罕见场面，洛迪卡斯简迪、艾宁夏兰特、马列斯同根度简4位球星围埋争论，最终根度简喺洛迪手上抢走个波，交畀马列斯操刀射入，但真正指派嘅刽子手原来另有其人！
12码事件发生喺完半场前，当时曼城已经领先紧2球，开纪录嘅洛迪第1时间霸住个波申请主射，但根度简即时介入「抢波」，最终派畀马列斯主射入网。2位主角完场後一齐接受访问，洛迪表示：「好明显，一切由队长(根度简)话事，我要接受佢嘅决定，佢话马列斯系常规刽子手。我当时觉得好有信心，所以提出要求，但我明白同接受呢个决定。」
有趣嘅系，虽然洛迪同根度简话马列斯系指派嘅刽子手，但领队哥迪奥拿赛後竟然有另一讲法：「我锺意见到球员主动去射12码，不过始终有一个系首席人选，佢就系艾宁夏兰特。正常嚟讲夏兰特排第1、马列斯排第2，当时佢哋都有参与讨论，我会再同佢哋倾下。」
