周二(14日)凌晨英超「默西赛德郡打吡」，今季沉沦嘅利物浦大踢争气波，主场以2比0击败死对头爱华顿，拎到2023年首场英超胜仗，1月加盟嘅荷兰翼锋加普亦拎到转会後第1个入球，加上罗拔图法明奴同迪亚高祖达今仗久休复出，「红军」季尾有望重拾光辉，冲击前4位置。
利物浦踏入2023年後英超4场不胜(1和3负)，今场打吡战斗志相当高昂，35分钟爱华顿中坚达高斯基头槌顶中柱，利物浦随即快速反击，达云纽尼斯左路快放後，传中畀穆罕默德沙拿乖巧挑入。换边後4分钟利物浦再有反击机会，加普接应阿历山大阿诺特传中近门射入，系佢加盟「红军」後首个入波，亦协助球队赢2比0完场。
利物浦赢波後排喺联赛榜第9位，落後第4位嘅纽卡素9分但踢少1场，仍有机会争夺欧联资格。除咗加普开斋之外，利物浦今场有养伤2个月嘅罗拔图法明奴，同养伤4个月嘅迪亚高祖达後备上阵，加上路尔斯戴亚斯亦接近复出，利物浦豪华锋线将回复「夫添」，自然更有信心。
「红军」领队高普完场後再做招牌「连环拳」庆祝，佢赛後表示：「呢场胜仗令我如释重负，我都唔想咁做(连环拳)，但你唔知下次几时先有得再做。晏菲路今场气氛冇得顶，我哋各方面都做得好好，今场我见到一支真正团结嘅球队。」
