英超VAR再闹笑话！周日(12日)凌晨大战，阿仙奴主场被宾福特逼和1比1，争标路途痛失2分，不过今场最大话题落喺球证执法之上，宾福特所入1球疑似「双重越位」，但VAR喺第1个越位问题作争议性判决後，竟然「唔记得」喺第2个更关键嘅画面画线，随时影响英超争冠大局！
阿仙奴上场输畀爱华顿後，今场迎战宾福特志切争胜，全场围攻屯重兵防守嘅客队，而宾福特嘅反击就贵精不贵多，令形势陷入胶着。66分钟阿仙奴终於打开缺口，布卡约沙卡右路突破传中，後备上阵嘅李安度杜沙特伏兵门前射入，亦系佢上月加盟阿仙奴後首个入球。
8分钟後出现争议一幕，宾福特由艾云东尼门前顶成1比1，但系处於越位位置嘅宾诺克喺过程中阻挡对手中坚，VAR球证李美臣认为唔算影响球赛，争议性判入球有效。关於系咪「影响比赛」属灰色地带，更离谱嘅系，基斯甸洛加特喺随後助攻入波一刻，同样明显凸出，但VAR竟然「唔记得」画线，最终两队踢成1比1平手。
比赛期间身处VAR房嘅英国职业裁判员公司(PGMOL)代表基斯福尔，向《每日邮报》证实乌龙一幕：「VAR查紧宾诺克有冇越位，同埋有冇阻挡对手，同时睇下有冇犯规情况，最後认为入面冇明显错误。但系关於基斯甸洛加特喺越位位置助攻，李美臣只系好快咁睇完，唔记得去画线，如果画线一定系越位，呢个属於人为错误。」
专责VAR球证李美臣早有前科，佢今季2次判决被PGMOL证实为错判，一度被罚停赛，2次错判当中包括阿仙奴今季首场败仗，加比尔马天尼利嘅入球被作废。阿仙奴领队阿迪达赛後不满表示：「我认为个波系越位，但已经太迟，球证判咗入波，我哋失咗2分。」
