曼城被控财务违规，面临扣分等处罚之後，一度传出领队哥迪奥拿将於今夏「跳船」离队，呢位52岁西班牙名帅喺出战嚟紧周一(13日)凌晨英超对阿士东维拉嘅记者会上，打破沉默大反击，表明相信球会系清白，并会继续留队。
哥迪奥拿喺记者会上好激动话：「我可以向你保证，我唔会离开曼城，甚至比任过去何时候更想留低，球会并冇欺骗我，2020年欧洲足协都曾经控告我哋违反公平财政条例，但我哋成功推翻判决，证明曼城冇做错任何事，点解我唔相信球会？」
哥帅曾经透露如果曼城故意隐瞒佢球会财务违规，佢就会离队，如今佢决定向球会管理层投下信任一票。
另外，哥迪奥拿批评其他19间英超球会落井下石：「英超有19队一齐指责我哋，却唔畀机会我哋解释，喺呢个国家，被证明有罪之前，每个人都系无辜。」哥迪奥拿亦警告其他英超球会「睇路」，一旦曼城被入罪开咗先例，其他球会将来都可能面临同样指控，唔好以为唔关自己事。
