曼联前锋格连活特因被控强奸、伤人同强制控制他人，被曼联暂停操练/比赛1年後，早前获英国皇家警察检察院撤销控罪，「红魔鬼」亦宣布会进行内部审查，再决定畀唔畀佢重返球队。不过，有曼联女足球员就提出反对，认为格连活特归队会令佢哋「唔舒服」。
21岁嘅格连活特目前仍然系曼联注册球员，理论上随时都可以归队上阵，但英国《每日邮报》消息指，多位曼联女足成员唔想格连活特归队，认为会令佢哋「感到唔舒服」，曼联女足球迷会创办人拿塔莉更表示：「曼联系世界最大球会之一，佢哋应该有鲜明立场，畀格连活特归队系大错特错，球会一直推动女子足球，鼓励女性参与足球活动，如果畀格连活特返嚟，就同呢个宗旨背道而驰。」
格连活特前女友Harriet Robson上年1月，喺社交网公开被格连活特殴打同强奸嘅证据，但女方之後因为唔愿意作证，令英国皇家警察检察院撤销所有控罪。据报除曼联女足之外，男足球员亦唔希望格连活特归队，影响球队今季建立嘅更衣室和谐气氛。
