曼城被起诉财务违规唔单止系英超嘅事，更可能波及欧洲各豪门，一度被财务公平法案针对嘅巴黎圣日耳门受影响最严重，佢哋近日与美斯续约进展停滞，消息指呢位新球王被会方要求减薪续约，而且唔会有签字费。
PSG背後有卡塔尔体育投资基金支持，一向洗脚唔抹脚，同基利安麦巴比续约後，球会薪酬开支超负荷，今季就要处理高达3亿欧元债务，麦巴比年薪系税後9400万欧元，尼马系4000万欧元，美斯3000万欧元，养起「无敌三叉戟」嘅开支，球会想唔财务违规都几难。
美斯刚夺得世盃冠军，奠定球王地位，有消息指，会方近日派出甘波斯同美斯倾续约，竟然要求佢减薪兼冇签字费，点都讲唔过去。因此近日再传出美斯重投巴塞，而沙特方面亦继续重金拉拢美斯过档，呢位阿根廷队长今夏动向仍然备受瞩目。
