英超榜首阿仙奴上仗联赛0比1不敌护级球队爱华顿，令好多球迷大跌眼镜，有分析发现兵工厂主帅阿迪达近5场英超都排出相同正选阵容，一味食老本，路数已被对手睇穿，令到爱华顿新帅戴治可以作出针对性部署。
阿仙奴今季成绩彪炳，阿迪达重用「胜利11人」亦无可厚非，但同一招用得太耐，难免被对手发现弱点。爱华顿喺新帅戴治领军下，今仗采取体力型踢法，一人跑多一步不断逼抢，成功克制兵工厂。
值得一提，阿迪达成为阿仙奴史上首位连续3次英超作客爱华顿，都输波而回嘅主帅，可见佢一直冇吸取教训，甚至系黔驴技穷，去到葛迪逊公园球场面对「拖肥糖」就冇晒符。
睇番阿仙奴近5场英超取得3胜1和1负，其中对曼联一役，要踢到补时先至入波险胜，近期表现并唔突出，难怪英国传媒认为阿迪达系时候作出改变，下仗对宾福特，应该用新兵李安度杜沙特取代加比尔马天尼利嘅正选位置。
