英超排尾2嘅爱华顿，今个冬季转会窗录得0支出，反而出售主力安东尼哥顿获得4560万欧元收入，转会窗关闭後，佢哋只能寻找自由身球员，近日正与加纳世盃队长安祖阿休接洽，但要面对诺定咸森林同水晶宫竞争。
爱华顿冬窗最大动作系换帅，戴治取代林柏特执教，而新帅仅从U21提拔球员上一队，并无签新球员，直至冬窗关闭後终於有进展，33岁安祖阿休日前抵达英国，同多支英超球队接触，爱华顿系其中一队。
安祖阿休同爱华顿代表已进行首轮谈判，不过佢仲要睇埋诺定咸森林同水晶宫条件先做决定，特别系森林主帅古柏同安祖阿休曾於史云斯合作过，爱华顿要签佢唔系咁易。
安祖阿休踢过韦斯咸同史云斯，早就适应英超环境，佢之前效力卡塔尔艾萨德，上季仅上阵9场入3球，喺卡塔尔世盃3场分组赛都有上阵，射入1球。
