车路士喺冬季转会窗疯狂买人後，阵容星光熠熠，以1.06亿镑加盟嘅安素费南迪斯周三(1日)亮相，佢将会着起佐真奴离队後空出嘅5号球衣。不过人多都有烦恼，车仔领队朴达依家要为欧联名单头痛，事关欧洲足协规定下半季只可以更改3个球员名额，意味价值1.2亿嘅6大球星将会被Out。
车路士冬天狂签8名新兵，除咗文路古士图会喺下季先加盟，其余7位新将都等住表演，不过欧洲足协规定，车路士只可以更改3个名额，意味至少4个新兵冇份踢欧联，一般估计安素费南迪斯、梅迪历同祖奥菲历斯会获垂青，班洛特巴迪亚舒尼、安祖山度士、大衞科芬拿同马杜基就名落孙山，去年夏天收购嘅加比尔史路连拿1月归队，同样唔会有份注册。
除此之外，车路士本身已注册24个球员(最多25个)，扣番离队嘅佐真奴，仲要踢走1人先可以腾出3个名额，死线日转会巴黎圣日耳门失败嘅薛耶治，预料会系被踢走嘅人选。
