阿仙奴由於斟介白礼顿中场摩西斯卡些度未有进展，英国传媒大爆佢哋嘅Plan B，竟然系车路士中场佐真奴，甚至已经达成协议准备签约，不过「厂粉」对呢单交易唔多睇好。
监於艾利尼可能因伤提早收咧，令阿仙奴中场人手紧绌，所以希望喺冬窗增兵，虽然主帅阿迪达心仪白礼顿中场摩西斯卡些度，但两次报价都畀「海鸥」拒绝，加上临近冬窗关闭，惟有向Plan B埋手。根据英国传媒报道，阿仙奴嘅Plan B，竟然死敌车仔中场佐真奴，有指双方签约1年半，转会费约1200万镑，连转会专家罗曼奴都话呢单交易已经倾掂数，呢位意大利国脚亦赶去阿仙奴训练基地准备签约，事前冇漏出半点风声，真系快过打针。
不过部分「厂粉」唔太睇好呢单交易，一来佐真奴近两季水准大跌，之前射失12码令意大利无缘杀入上年世盃决赛周，类型上与摩西斯卡些度截然不同，而且阿仙奴喺2020-21年季从车仔签入自由身嘅韦利安，嚟到冇料到之余，年纪大兼高薪，几经辛苦先清走佢，今次再签入年逾30嘅车仔卖剩蔗佐真奴，「厂粉」惊佢成为韦利安翻版。
