热刺喺冬季转会窗完结前，宣布收购士砵亭右闸柏度朴路，转会系以先借用形式，再喺夏天强制性4,200万镑买断。柏度朴路嘅加盟令伦敦出现「三角关系」，事关呢位23岁球星曾被质疑勾义嫂，偷食车路士新兵祖奥菲历斯女友，月底呢场「伦敦打吡」更有睇头。
热刺领队干地对右翼衞进行执位，先同马特杜靴迪解约畀佢转会马德里体育会，又将小将迪积史宾斯外借法甲嘅雷恩，腾出空间签入葡萄牙球星柏度朴路，预料佢会即刻成为热刺正选右闸，巴西球员艾马逊会做佢後备。
柏度朴路名气唔大，但上年亦曾成为新闻人物，佢喺上年5月为士砵亭比赛後，被影到唔理身边多位小球迷，直接走到场边向一位美女献吻，而女主角竟然系祖奥菲历斯女友Magui Corceiro，之後再有影片流出，报称系柏度朴路同Magui喺夜店激吻，不过两人随即否认「有路」，澄清佢哋只系非常亲密嘅朋友。
