深受降班威胁嘅爱华顿早前解雇领队林柏特之後，正如外界所料，请来大热人选戴治接手领军，呢位51岁前般尼主帅表示，将会畀球员更多自由空间，尽量发挥各人长处，球队表现自然可以获得提升，有信心护级成功。
戴治曾於2012至22年执教般尼长达10年，但上年4月被炒之後一直未有教职，佢话对於可以担任爱华顿新帅感到非常荣幸：「我同教练团成员已经准备好带领球队重回正轨，我知道爱华顿球迷充满热情，我会畀佢哋睇到想见嘅事情。至於爱华顿球员都好有质素，我哋会制定一套新战术，令球员有更多自由发挥空间，令佢哋享受足球，当然球队必须赢波。」
爱华顿今季英超20战仅15分，以较多净得球力压同分包尾嘅修咸顿，排紧尾二。爱华顿将於2月4日晚英超主场对榜首阿仙奴，意味戴治首仗领军就要「打大佬」，恐怕好难捱。
