周日(29)凌晨英足盃第4圈赛事，曼联主场3比1轻取英冠球队雷丁後，成为今季英超唯一一队仍然喺3项盃赛逐鹿嘅球队。「红魔鬼」可唔可以做盃赛3冠王，好大程度视为卡斯米路表现，呢位巴西防中今仗轰入2个靓波，加盟曼联後已直接间接贡献9个入球，堪称系全能核心。
曼联喺英联盃半只脚踏入决赛，今仗英足盃继续强阵出击，上半场面对雷丁顽强抵抗闷和0比0，但下半场卡斯米路大爆发，55分钟接应安东尼马菲奥斯直线，乖巧笠过出迎门将射入，3分钟後卡斯米路离门廿几码抽射轰入死角，短短4分钟就为曼联建立大好形势。
雷丁落後下愈踢愈急，前锋安祖卡路尔2次粗野犯规换嚟2黄1红，踢多个嘅曼联喺66分钟由费特门前用後脚射入，遥遥领先3比0。大局已定下曼联放软手脚，72分钟被雷丁破蛋，但无阻曼联取得主场11连胜，顺利晋级英足盃第5圈。
曼联喺欧霸盃晋级淘汰赛、英联盃4强首回合领先诺定咸森林3比0、英足盃又跻身第5圈赛事，系英超唯一有机会挑战盃赛3冠王球队，领队坦哈格表示欢迎挑战：「我哋想争冠军，所以唔会有投诉(赛程密集)，亦欢迎面前嘅挑战，曼联有足够强大嘅阵容去应付。」
巴西中场卡斯米路上年夏天由皇家马德里加盟，担任防中嘅佢唔单止防守出色，就连进攻都孭重飞，连续今场2球，佢喺曼联已有4入波同5次助攻，坦哈格表示：「佢喺皇马赢4次、5次欧联冠军，亦系每一任皇马教练最重用嘅球员，你就知道佢喺英超一样会发挥影响力。」
