国际足协周六(28日)就卡塔尔世盃H组乌拉圭对加纳赛後，FIFA官员遇袭事件公布判决及处分，乌拉圭荷西基文尼斯、梅斯利拿各停赛4场，卡云尼、高甸各停赛1场，乌拉圭下仗主场关闭部分看台兼罚款，可能国际足协都觉得自己理亏，今次罚得都算轻。
事件起因好简单，当日乌拉圭赢加纳2比0，但由於同时间举行嘅南韩2比1击败葡萄牙，搞到乌拉圭出局，而比赛期间卡云尼、达云纽尼斯多次禁区内被侵犯都冇12码，球证又唔睇VAR，咁样搞法佛都有火，乌拉圭被淘汰後，班球员好激动同球证及官员理论，甚至出现冲突，有官员遇袭，亦有球证被「问候」。
事发後有评论指，乌拉圭球员最重将面临停赛15场，不过依家睇番判罚就湿湿碎，最重停4场，轻嘅停1场，然後乌拉圭被罚款5万瑞士法郎，下场主场只系关闭部分看台，而唔系闭门作赛，等如话畀佢听：今次就咁算，下次唔好喇。
