曼联前锋拉舒福特近期入球停不了，而佢嘅入波庆祝动作—手指向太阳穴亦红遍球坛，祖连顿、布卡约沙卡、甘美治都争相仿傚，不过大家可能以後都不能再用，因为「福仔」正入纸申请呢个庆祝动作做注册商标，一旦申请成功，其他人都唔可以再模仿。
福仔手指向「魂精」呢个动作，外界解读为向主帅坦哈格表达敬意嘅意思，因为坦哈格入主以来，给予福仔足够信任，令佢喺上季阴影中走出嚟，至於福仔本人嘅解释就系，曾经对自己感到困惑同挣扎，依家走出谷底，就要尽量保持清醒。
佢连场入波再做呢个动作，结果红遍足坛，个个入波都有样学样，令到福仔团队睇到商机，近日佢团队已向英国知识产权局入纸申请注册商标，获得批准後将获得10年保护，不但其他人唔可以用，佢仲可以喺电脑游戏、影像延伸、体育用品及书籍都有版权，呢个不失为一条财路，但先决条件系福仔要不断入波，如果入唔到波只会系笑话。
