曼城目前喺英超排第2位，欧联同英足盃亦喺争冠行列，不过近日传闻更衣室出现「裂痕」，祖奥简斯路、基尔获加、贝拿度施华、根度简同拿朴迪5大球星，被指对领队哥迪奥拿有所不满，目前正考虑转会方案，巴塞隆拿更加虎视眈眈。
西班牙记者荷西艾华利斯喺《El Chiringuito》节目爆料：「曼城正蕴酿大清洗，因为更衣室出现问题，好多球员都有离心。」贝拿度施华一直拒绝续约，上年夏天已几乎离队、根度简亦会喺季尾完约，离队机会好大，拿朴迪个Case同贝拿度施华差唔多，都系想转投其他豪门。
上季踢到晓飞嘅祖奥简斯路，今季同基尔获加一齐失宠，哥迪奥拿喺左闸位置试用唔同球员，荷西艾华利斯透露：「祖奥简斯路同哥迪奥拿、教练团关系唔系咁好，所以佢想转会。」基尔维加嘅右闸位亦被小将列高路易斯抢走，同样萌生去意。5个「作反」球员当中，除基尔获加外4人都系巴塞目标名单当中。
