周日(22日)英超赛事，曼城主场清风送爽下3比0大胜狼队，包办入波嘅又系挪威前锋艾宁夏兰特！艾宁夏兰特加盟曼城只系半季多啲，喺英超已经第4次上演帽子戏法，依家以25球排射手榜第1位，入球数字已超越上季孙兴民、穆罕默德沙拿拎金靴奖嘅23球，非常夸张。
曼城为追赶榜首阿仙奴，每场比赛都不容有失，今仗迎战狼队控制战局，艾宁夏兰特40分钟头槌顶入打破僵局；50分钟根度简博到12码，艾宁夏兰特操刀射成2比0，4分钟後佢再接应马列斯助攻完成帽子戏法，今季对水晶宫、诺定咸森林同曼联後，第4次喺英超连中三元。
曼城领队哥迪奥拿赛後表示：「艾宁夏兰特嘅数据系难以置信，佢24小时都系为足球而活，佢有一班神奇嘅队友为佢铺桥搭路。曼城依家嘅成绩同我哋以往几次捧盃嘅成绩好接近，证明球队并冇下跌，我哋要做嘅就系继续进步。」
