阿仙奴显露冠军霸气！周一(23日)凌晨英超重头戏，阿仙奴主场同曼联合演一场水平极高嘅激战，最终「兵工厂」喺90分钟绝杀，戏剧性後上3比2赢波。阿仙奴踢完19轮联赛後拎50分，系球会史上最好半季成绩，依家领先次席曼城5分兼踢少1场，夺标形势大好。
两大劲旅驳火战况激烈，曼联17分钟由拉舒福特禁区外冷箭得手，7分钟後阿仙奴靠一次美妙组织，由尼基迪亚门前顶入追平，半场踢成1比1平手。换边後阿仙奴逐渐控制战局，53分钟布卡约沙卡右路轰入世界波，但领先只系6分钟就被利辛度马天尼斯喺角球攻势顶入。
争胜决心极大嘅阿仙奴尾段围攻曼联，布卡约沙卡曾劲射中柱，新加盟翼锋李安度杜沙特亦首度登场，84分钟尼基迪亚近门狂抽又被迪基亚神救，眼见两队将握手言和，尼基迪亚90分钟门前怪脚射入，VAR检查後证实冇越位，阿仙奴戏剧性3比2赢波。
阿仙奴完成19场联赛後，以16胜2和1负50分成绩排榜首，系英超史上第5次有球队喺半季拎到50分或以上，亦系阿仙奴史上首次，领队阿迪达赛後表示：「我唔知冠军要拎几多分，但肯定系好高好高，阿仙奴上半季踢得非常之好，值得排喺榜首，但我哋知道仲有好多地方要改善，呢个亦系我哋目标。」
