周四(19日)凌晨英足盃第3圈重赛，列斯联主场以5比2大炒卡迪夫城，意大利19岁新星基诺图光芒四射，佢喺开波26秒就「凌空铰剪脚」入波，被网民大赞「劲过迪肯尼奥」，列斯联领队马殊亦对佢有赞冇弹。
列斯联今场26秒就由基诺图轰入金球，洛迪高34分钟拉开纪录，基诺图36分钟再建一功半场领先3比0；列斯联下半场继续进攻，班福特梅开二度扩大纪录到5比0，卡迪夫城尾段入番2球挽回多少面子，但列斯联仍赢5比2晋级第4圈。
19岁嘅基诺图系意大利国脚，上年夏天以400万镑由FC苏黎世加盟，近期喺列斯联极速上位，佢今场嘅「凌空铰剪脚」入波，令人谂起意大利名将迪肯尼奥喺2000年，代表韦斯咸射爆温布顿嘅经典窝利，唔少网民更留言：「劲过迪肯尼奥！」
列斯联领队马殊赛後亦表示：「基诺图好聪明，佢先攞身位为自己制造空间，就啱脚位轰入精彩一球。基诺图有智慧、谦虚兼且不断求进，我肯定佢依家嘅身价唔止400万镑！」
