曼联新借用嘅荷兰前锋韦格贺斯已经参加操练，并表现出不俗状态，有望喺周四(19日)凌晨英超首次为红魔鬼披甲对水晶宫。领队坦哈格表示，早於韦格贺斯16岁时，已经认识佢，并一直有留意佢表现，相信呢位高大射手可以为球队带来重要贡献。
C朗离队後，坦哈格一直想签入前锋填补空填，结果搵来韦格贺斯，佢对於呢位30岁荷兰同胞赞不绝口：「韦格贺斯16岁时候，我已经识佢，佢无论去到边，都可以带来惊喜，无可否认佢效力般尼期间表现稍逊，但只系好短时间，佢拥有顽强斗志，进攻同防守都有作为，属於我想签入嘅球员类型。」
身高1米97嘅韦格贺斯上季效力般尼踢20场英超仅入2球，但今季外借去土耳其球队比锡达斯，半季时间上阵18场入9球，并喺今届世界盃8强荷兰对阿根廷，後备上阵入2球，表现的确令人惊喜。
虽然曼联7号球衣悬空，但韦格贺斯并无意做「C朗替身」，佢已选择着27号。
