曼联同C朗拿度解约後，收购新前锋成为首要任务，「红魔鬼」虽然借得荷兰前锋韦格贺斯，不过呢位高大前锋似乎唔系长远计划，前队长里奥费迪南近日就喺自己网上节目献计，话曼联前锋最适合人选只有1个，就系哈利卡尼。
里奥费迪南喺自己嘅网上节目表示：「曼联要签哈利卡尼。热刺球迷好对唔住，你哋唔会赢到任何锦标，哈利卡尼喺热刺唔会赢到任何冠军，佢哋依家都陷入泥沼，收购哈利卡尼会非常昂贵，但佢可以保证你1季20至25个入球，哈利卡尼只适合加盟曼联。」
哈利卡尼今季19场联赛已入15球，而曼联依家首席射手拉舒福特近期虽然频频入波，但仍只有8个联赛入球，「产量」同C朗拿度、哈利卡尼等金靴射手有明显差距，预计曼联今个夏天会斥巨资收购顶尖前锋加盟。
