曼城前锋艾宁夏兰特开季以来一路疯狂入波，但近期突然哑火，近3次上阵都冇波入，包括今轮英超对曼联，踢足全场只有2次射门，并且唔中目标，被网民寸神话破灭，曾效力曼城嘅德国名宿夏文踩多一脚，指「蓝月亮」以往冇夏兰特，表现仲好。
艾宁夏兰特今季英超已入21球，包括上年10月英超主场对曼联，上演帽子戏法，被睇好今季英超入到40球以上。不过，呢位22岁挪威国脚近期状态下滑，近3次上阵都未能取得入球，其中2场更加输波。
艾宁夏兰特一直被视为曼城最後一块拼图，签入佢就可以所向无敌，但依家证明事实并非如此，夏文更指夏兰特系曼城嘅负累：「如果冇夏兰特，曼城会系1支更佳球队，就算佢今季入到40球，我都系咁讲，佢喺球场上嘅目标太明显，一定成为对手重点打击对象，长期会令球队付出代价。」
今仗客串曼联中坚位置嘅劳基梳尔表示，球队并冇特别安排冻结夏兰特，而系靠全队做好防守工作，令对手难以组织攻势，结果夏兰特只有19次触球机会，当中得3次喺曼联禁区内触球，可以话系踢到隐形。
