车路士抢走阿仙奴目标重金签入梅迪克，充分显示有钱就是任性，佢哋收购行动未停止，消息话仲要买多2人，其中1个就系白礼顿中场摩西斯卡些度，白礼顿见咁大条水鱼出现，唔叫高价就笨，将叫价7500万镑。
今个冬窗车路士出手豪爽，高价借入祖奥菲历斯，跟住抢签梅迪克，而且非常心急，准备喺冬窗期内向白礼顿收购厄瓜多尔世盃国脚摩西斯卡些度，实行以本伤人。
卡些度现年21岁，喺卡塔尔世盃为厄瓜多尔上阵3场，预计将会系未来国家队主力，2021年加盟白礼顿後曾外借到比利时低组别历练，今季归队後上阵机会较多，上阵20场入1球。
白礼顿拥有唔少世盃国脚，最劲嗰个系冠军阿根廷成员阿历斯麦亚里士打，虽然今季卖咗唔少球员畀人，依家踢紧车路士嘅古古列拿同领队朴达都系来自白礼顿，但咁多主力离队後球队仍保持强劲表现，上仗大炒利物浦3比0，依家又准备出售卡些度，此子在《转会市场》估价3800万欧元，依家向车路士7500万镑兜售，当正对方系水鱼。
